हामीले चाडपर्वमा सामुदायिक सुरक्षामा विशेष जोड दिएका छौँ

सामान्यता प्रहरी जुनसुकै समयमा पनि सक्रिय हुनुपर्छ । सामुदायमा शान्ति सुरक्षा र अमनचयन कायम गर्ने जिम्मेवारीमा रहेका प्रहरीलाई बढी दौडधुपको समय भनेको संकट परेको बेला वा चाडबाडको बेला हो । रमाईलोको नाममा गरिने मदिरा सेवनका कारण समाजमा झैझगडादेखि विभिन्न आपराधिक घट्नाहरु हुने गर्दछन् । जुवातास, चोरी लुटपाट लगायतका घट्ना हुने बेला पनि यहीं हो । यहीं परिवेशमा पर्वत जिल्लाको शान्ति सुरक्षाका लागि प्रहरीले कसरी तयारी गरिरहेको छ भन्ने विषयमा ढोरपाटनका पर्वत सहकर्मी संजय रेग्मीले जिल्ला प्रहरी कार्यालय पर्वतका प्रमुख प्रहरी नायव उपरीक्षक विश्वराज अधिकारीसँग कुराकानी गरेका छन् । प्रस्तुत छ कुराकानीको सम्पादित अंश ।
यो बेलामा विभिन्न सुरक्षा चुनौतीहरु बढ्ने जोखिम रहन्छ । पर्वत प्रहरीले यसको लागि कसरी तयारी गरेको छ ?
– हामीहरुले जिल्लाको समस्त अवस्थालाई नियालेर र विगतमा भए गरेका तथा अब पनि हुन सक्ने सम्भावित क्रियाकलापलाई मध्यनजर गरेर विभिन्न योजनाहरु तयार पारेका छौँ । हामीले पोशाकमा रहने प्रहरीसहित सादा पोशाकमा पनि प्रहरी परिचालन गर्ने गरी तालिका नै तयार पारेका छौँ । कसले कुन ठाउँमा निगरानी राख्ने हो र त्यो ठाउँमा हुन सक्ने सम्भावित कुराहरु के के हुन सक्छन् ? भनी पूर्वानुमान समेत गरेर खाका बनाएका छौँ । राजमार्गमा गरिने गस्ती, मोबाईल गस्ती, मोटरसाईकल गस्ती लगायतका योजनाहरु तयार पारेर कार्यान्वयन गरिसकेका छौँ ।

पर्वतको अवस्थालाई हेर्दा र बिगतलाई पढ्दा हुन सक्ने सम्भावित अपराधहरु के के हुन सक्छन् ?
– अपराधका हिसाबले त्यती धेरै जोखिमको अवस्था पर्वतमा छैन् । यसको अर्थ फेरि घटना हुँदैनन् भन्ने होईन् । हामीहरु हाई अलर्टमा बसेका छौँ । यहाँको अवस्थालाई हेर्दा जुवातास, चोरी, डकैती, लुटपाट, मदीरा सेवन गरेर हुने झगडा तथा रिसको आवेगमा अचानक हुने नराम्रा निर्णयहरु बढी देखिन्छन् । त्यस्ता खालका आपराधिक गिरोहको प्रभाव यहाँ देखिएको छैन् । त्यसैले समुदायिक सुरक्षामा हामीले बढी जोड दिएका छौँ । कोही नभएको मौकामा घर लुट्ने, बाटोमा एक्लै परे गहना लुट्ने, सवारीहरुले बढी यात्रु राखेर बढी भाडा असुल्ने समस्याका रुपमा आउन सक्छन् ।

प्रहरी जनशक्तिले बजार र गाउँ सबै ठाउँको निगरानी गर्न कसरी सम्भव छ ?
– हो प्रहरी दरबन्दी कम छ, तर यो बेलामा हाम्रो खटाईको तरिका फरक खालको हुन्छ । हामी थोरै समयमा धेरै काम गरेका हुन्छौँ । अघिपछिको भन्दा यो बेलामा हाम्रो सक्रियता झनै बढेको हुन्छ । बर्दी लगाएका प्रहरी टोलमा पुग्नु मात्रै सक्रियता होईन् । टोल वा गाउँको अवस्थाको बारेमा हामीले पूर्व जानकारी लिईसकेका हुन्छौँ । बजारको कुरा गर्दा कुस्माबजारमा अहिले २० ओटा सिसि क्यामेरा संचालनमा पनि आएका छन् । तिनीहरुको माध्यमबाट बजारको निगरानी गर्न हामीलाई सजिलो छ । ग्रामिण क्षेत्रका विभिन्न ठाउँमा प्रहरी यूनिटहरु रहेका छन् । त्यहाँ रहेका दरबन्दीबाट पालो अनुसार दैनिक रुपमा गस्तीको काम हुन्छ । कसैले पनि प्रहरीमा कुनै जानकारी दिएमा स्रोतको नाम गोप्य राखेर त्यस बिषयमा तुरुन्तै रेस्पोन्स भईहाल्छ । आम नागरिक बर्दी बिनाका प्रहरी हुनुहुन्छ । उहाँहरुले प्रहरीको रुपमा काम गर्नुहुन्छ । प्रहरी समुदाय साझेदारी कार्यक्रमले पनि यसलाई सघाएको छ ।

जुवा त लुकेर खेलिन्छ, अनि प्रहरीले कसरी देख्छ ?
– खुल्नेहरुलाई लुकेको जस्तो लागेको हो । अहिलेसम्म पक्राउ परेकाहरु पनि लुकेरै हो नी खेलेको त । तर हामीलाई सूचना आउँछ, हाम्रा गुप्तचरहरुले त्यस्तै खालको निगरानी गरिरहेका हुन्छन् । म भन्छु जुवातास खेल्दै नखेल्नुहोस् । कसैले गल्ती नै नगरे पक्राउ गर्नै पर्दैन । तर यदी खेल्नुभयो भने हामीलाई तपाईँकै परिवारका सदस्यले सूचना दिएका हुन्छन् र हामीले पक्राउ गर्ने छौँ । प्रहरी समुदाय साझेदारी कार्यक्रमले पनि आम नागरिकलाई प्रहरीसँग नजिक बनाएको छ । महिनामा कम्तीमा पनि २५ ओटा कार्यक्रमहरु गरेर हामी समुदायमा भिजेका छौँ । पहिले प्रहरीसँग डराएका कारण पनि सूचना आउँदैनथे होला । अब त्यस्तो हुँदैन ।

सर्वसाधारण नागरिक प्रहरीसँग डराए पनि केही पावरका आधारमा पार पाउने दाबीका साथ खेलीरहेका हुन्छन् नि ?
– हुन सक्छ । तर जुवातास खेलेको पाएमा जो भए पनि हामीले नियन्त्रणमा लिने छौँ । हामीले समातेपछि कसैको पनि केही लाग्ने छैन । नियम र कानुनमा जे जे भनिएको छ सोही अनुसार कारबाही हुने कुरामा सबै ढुक्क रहनुहोला । पक्राउ परेपछि नाम बाहिर आउँदा बेईज्जत भयो भनी पश्चाताप गर्नुभन्दा जुवातास खेल्ने कामै नगर्नुहोस् । हामीले अहिलोसम्म कसैको प्रभावमा परेर समात्ने र प्रभावमा परेर छाड्ने काम गरेका छैनौँ । कानुन भन्दा बाहिरका काम गर्ने सबै अपराधी हुन्, तिनीहरुलाई कानुनी दायरामा ल्याउनु हाम्रो कर्तब्य हो । हामी हाम्रो पेशाप्रति कर्तब्यपरायण छौँ ।

यो बेला ट्राफिक व्यवस्थापनको चुनौती निकै हुने गर्छ ? तपाईँहरुले तयारी कसरी गरिरहनुभएको छ ?
– यहाँ आवश्यक परेको अनुसार ट्राफिक प्रहरीको दरबन्दी छैन् । यही कारण जहाँ जहाँ ट्राफिक प्रहरीको उपस्थिति हुनुपर्ने हो त्यो ठाउँमा जनपथ प्रहरी पनि सँगसँगै हुनेछन् । यहाँको ट्राफिक प्रहरीले सक्रियताका साथ काम गरिरहेको छ । उहाँहरुले बजारदेखि ग्रामिण क्षेत्रमा आउजाउ गर्ने तथा अन्तर जिल्ला आउजाउ गर्ने सवारीहरुको पनि निगरानी गरिरहनुभएको छ । ट्राफिक प्रहरीको सक्रियतामा क्षमताभन्दा बढी यात्रु राख्ने, क्षतमा बस्ने, बढी भाडा असुली गर्ने लगातका क्रियाकलापमा प्रत्यक्ष र अप्रत्यक्ष अनुगमन भइरहेको हुन्छ । हामीले जिल्लाका चार ठाउँमा यात्रु सहायता कक्ष पनि निर्माण गरेका छौँ । यात्राका क्रममा सवारीका सञ्चालक वा यात्रुले कुनै पनि समस्या भोगेमा वा सामग्री हराएमा पनि ती सहायता कक्षमा रहेका प्रहरीलाई जानकारी गराएपछि तुरुन्तै रेस्पोन्स हुन्छ । कोरोनाका कारण गएका बर्षहरुमा जस्तो यसवर्ष सवारीमा त्यती धेरै चाप देखिएको छैन् । म त भन्छु यो बेलामा यात्रा गर्नु राम्रो पनि होइन् । जो जहाँ छौँ, त्यही ठाउँमा सुरक्षित तरिकाले दसैँ मनाउनु नै उत्तम हो, आयु बढाउने उपाय हो ।ढोरपाटन दैनिकबाट

सम्बन्धित समाचार

Comments are closed

भर्खरै view all

कोरोना नियन्त्रणको प्रयासमा जुटे पर्वतका स्थानीय तह

मदन भण्डारी लोकतान्त्रिक आन्दोलनका धरोहर : प्रधानमन्त्री ओली

पर्वतको निषेधाज्ञामा आज देखि झनै कडाइ, बैंकसमेत बन्द

माधब नेपालको चाहना दिनभित्रै कार्यदलबाट निर्णय, ओलीको योजना बिहीबारपछि

औषधी उत्पादककले बन्द गरे कोरोना उपचारमा प्रयोग हुने औषधिको उत्पादन , मुल्य बढाउनुपर्ने माग